Новиот шеф на Мисијата на ЕУ во Косово, Орав ја презеде должноста: Целта ми е да го доближам Косово до ЕУ

Амбасадорот Аиво Орав, естонски дипломат со над 30 години искуство на национално и на ниво на Европска Унија, во дипломатијата и прашањата на ЕУ, денеска ја презеде функцијата шеф на Канцеларијата на ЕУ/Специјален претставник на Унијата во Косово, јави дописникот на МИА од Приштина.

Амбасадорот Орав, кој претходно беше постојан претставник на Естонија во ЕУ и шеф на делегациите на ЕУ во Црна Гора и Северна Македонија, на чело на Мисијата во Косово го наследи чешкиот дипломат Томаш Суниог.

Во објава на платформата Икс, естонскиот дипломат рече дека со нетрпение очекува тесна соработка со домашните и меѓународните партнери, со цел приближување на Косово до ЕУ.

- Прв ден во мојата нова канцеларија како амбасадор на ЕУ во Косово. Со нетрпение очекувам тесна соработка со нашите локални и меѓународни партнери со цел унапредување на нашите политички и економски односи, поддршка на реформите, приближување на Косово до ЕУ и запознавање со Косово и неговиот народ, напиша Орав