Мисајловски во Тирана: Успехот на САД – Јадранската повелба е доказ за заедничката посветеност на регионалната безбедност и стабилност

Дискусиите на министерскиот состанок на САД – Јадранската повелба се доказ за нашата силна посветеност во унапредувањето на безбедносната соработка и промовирањето на мир, стабилност и добрососедски односи во нашиот регион, пореча денеска министерот за одбрана Владо Мисајловски кој учествува на работните сесии на овој состанок во Тирана.

Како што соопштија од Министерството за одбрана, Мисајловски на работните сесии на состанокот посочил дека од најголема важност за зацврстувањето на регионалната безбедност и стабилност е политичко-воената соработка на земјите од Балканот и посветеноста на земјите од Југоисточна Европа кон европските и евроатлантските интегративни процеси.

Соработката во рамките на групата А5, рече Мисајловски, е практична и испраќа јасна порака дека нашите народи сакаат да живеат во мир, безбедност и стабилност. САД – Јадранската повелба ја нарече успешен форум за консултации меѓу земји со заеднички демократски вредности.

Мисајловски повикал на прагматичност во однос на можностите за заеднички активности, особено во справувањето со хибридните и сајбер закани, кризниот менаџмент и справувањето со разни природни непогоди. Во однос на идните активности, министерот посочи дека земјите-членки треба да продолжат со напорите за идентификување на нови можности за соработка, споменувајќи ги областите како градење на отпорност и сајбер одбрана.

Од Министерството потенцираат дека Мисајловски заедно со останатите претставници од земјите членки на А5 потпишаа заедничка изјава по состанокот.

Како што е најавено, на маргините на министерскиот состанок, Мисајловски попладнево ќе има одвоени средби со неговиот албански колега, министерот Пиро Венгу и со помошничката секретар за одбрана на САД за меѓународни безбедносни прашања, Селест Валандер.

САД – Јадранската повелба е основана со Повелбата за партнерство помеѓу нашата земја, САД, Албанија и Хрватска во 2003 година. Во форматот А-5 постои од 2009 година кога кон Повелбата се приклучуваат и Црна Гора и Босна и Херцеговина. Земји-набљудувачи на А-5 се Словенија, Косово и Србија. Целта на оваа иницијатива е заеднички и координиран пристап кон исполнување на критериумите и стандардите на НАТО, унапредување на соработката во Југоисточна Европа и зацврстување на мирот, демократијата, стабилноста во регионот.