Макрон утре во Полска: Фокус на Украина и европските приоритети

Францускиот претседател Емануел Макрон утре ќе ја посети Полска за да разговара за европската поддршка за Украина по средбите со новоизбраниот претседател на САД Доналд Трамп и украинскиот колега Володимир Зеленски, соопшти Елисејската палата.

Макрон ќе се сретне со полскиот премиер Доналд Туск за да разговара за европската помош за Украина во новиот трансатлантски контекст и во пресрет на претседателството на Полска со Советот на ЕУ во првата половина на 2025 година.

Туск потврди дека Макрон ќе го информира за резултатите од средбите со Трамп и Зеленски, опишани како „кратки, но важни“. Доналд Трамп, кој стапува на функција на 20 јануари, повика на прекин на огнот и преговори за крај на конфликтот во Украина, ден по средбата со Зеленски во Париз под покровителство на Макрон.

Вчера Зеленски му изрази „длабока благодарност“ на Трамп за неговата „цврста решителност“ да стави крај на војната со Русија.

Макрон и Туск ќе разговараат и за претстојниот европски самит на 19 декември и ќе потврдат желба за нов импулс во билатералните односи меѓу Франција и Полска.

Франција и Полска се противат на договорот за слободна трговија меѓу ЕУ и четири држави од Меркосур (Аргентина, Бразил, Парагвај и Уругвај). Договорот сè уште чека ратификација од 15 држави-членки на ЕУ и Европскиот парламент.

За време на посетата, Макрон ќе се сретне и со полскиот претседател Анджеј Дуда