Велковски во Гевгелија: Обезбедуваме квалитетно и достапно предучилишно воспитание и образование за сите

Заменик министерот за социјална политика, демографија и млади Ѓоко Велковски денеска оствари работна посета на општина Гевгелија. Тој изврши увид во градежните активности за доградба на детската градинка „Детска радост“, коишто се во завршна фаза. Новиот објект „Сончогледи“ ќе обезбеди дополнителен капацитет за 135 деца, овозможувајќи поголем број семејства да имаат пристап до квалитетно предучилишно воспитание и образование, соопштени МТСП.

-Како родител и како човек, свесен сум за значењето на сигурна и поттикнувачка средина за децата. Горд сум што успеавме да го откочиме процесот на доизградба на објекти кои со години беа во застој. Денес, секој проект што носи подобар живот за граѓаните е наш приоритет, истакнал заменик-министерот.

За време на посетата, заменик-министерот одржал средби и со претставници на Здружението на лица со телесен инвалидитет „Мобилност“, Здружението на лица со попреченост „Порака“, Здружението на слепи лица и Здружението на лица со оштетен слух и говор.

На средбите биле дискутирани предизвиците со кои овие лица се соочуваат, како и можните решенија за подобрување на условите, пристапот до помагала и унапредување на законските рамки.

-Овие искрени разговори ме мотивираат уште повеќе да работам на создавање општество каде секој човек, без разлика на своите потешкотии, ќе има можност да живее достојно и со поддршка. Не застануваме додека не изградиме инклузивна заедница која ги прифаќа и вреднува сите“, нагласил заменик-министерот.

Со оваа посета, Министерството, велат оттаму, ја потврдува својата посветеност за унапредување на условите за живот и инклузија на сите граѓани.