Бах разочаран од скандалот со опремата на норвешките ски-скокачи
Претседателот на Меѓународниот олимписки комитет (ИОК) Томас Бах го коментираше скандалот околу манипулацијата со опремата на норвешките ски-скокачи на Светското првенство во Трондхајм.
-Слушнав за тоа, прочитав за тоа во медиумите и го следев овој случај. Исклучително сум разочаран и од фактот дека тоа јасно беше направено намерно. Не беше обична случајност туку јасна измама, изјави Бах.
Меѓународната федерација за скијање и сноуборд (ФИС) вчера привремено ги суспендираше ски-скокачите Мариус Линдвик и Јохан Андре Форфанг, како и Јорген Гробак кој се натпреварува во нордиска комбинација.
На опремата кај норвешките спортисти имало недозволени компоненти за да бидат подобрени нивните аеродинамички карактеристики.
