Изведбата на претставата „12“ во МНТ по повод Светскиот ден на театарот

Македонскиот народен театар ќе го одбележи Светскиот ден на театарот со изведбата на претставата „12“, по мотивите на Реџиналд Роуз (12 Angry Men), во адаптација и режија на Синиша Евтимов.

Како што соопштија од МНТ, традиционално, пред почетокот на претставата ќе бидат прочитани меѓународната и македонската порака посветени на актуелниот театарски миг, а кои ги сподели Македонскиот центар на ИТИ.

Автор на меѓународната порака е Теодорос Терзопулос, театарски режисер, едукaтор и автор од Грција, основач и уметнички директор на Аттис – Театарска компанија, инспиратор на Театарската олимпијада и раководител на Меѓународниот комитет на Театарската олимпијада. Авторот на македонската порака за 2025 година е актерот Емил Рубен, пензиониран актер од ансамблот на МНТ, филмски и ТВ-актер.

Двете пораки ќе бидат прочитани непосредно пред почетокот на претставата, а честа да се обратат на публиката е на актерките Арна Шијак и Софиа Насевска-Трифуновска.