Мицотакис: Знаеме дека зголемувањето на минималната плата не ги решава проблемите, но е прв чекор во правилна насока

Секако дека многу добро знаеме дека со зголемувањето на минималната плата не се решаваат проблемите на нашите сограѓани, на кои во моментов им се исплаќа овој минимален приход, но е еден чекор во вистинската насока, рече грчкиот премиер Кирјакос Мицотакис за време на посетата на Мнистерството за труд и социјално осигурување по повод воведувањето на новата зголемена минимална плата што сега изнесува 880 евра, јави дописничката на МИА од Атина.

На владина седница мината среда беше одлучено минималната бруто плата во Грција од 1 април да се зголеми за 50 евра, односно од 830 да изнесув 880 евра.

Мицотакис денеска при посетата на Министерството за труд рече дека е „симболичен ден, бидејќи стапува на сила петтото по ред зголемување на минималната плата“, потсети дека опфаќа над 1,5 милиони граѓани и изрази убедување дека ќе ја исполнат нивната предизборна цел, минималната плата во 2027 година да биде 950 евра.

-Се движиме во вистинската насока и во рамките на можностите на економијата, цврсто го поддржуваме расположливиот приход на сите наши сограѓани, особено на најслабите и работиме за да ги спроведеме сите цели што ги поставивме во 2023 година, кога грчките граѓани ни го доверија управувањето со земјата за овој четиригодишен мандат, посочи Мицотакис.

Се осврна и на невработеноста во земјата, нагласувајќи дека од над 17,5 отсто во 2019 година, сега е намалена под девет проценти и отворени се 500.000 нови работни места.

-Тројца од четворица вработени се со полно работно време. Просечната плата на работниците со полно работно време надмина 1.400 евра, истакна Мицотакис.

Министерката за труд и социјала Ники Керамеос посочи дека со зголемување од 50 евра месечно, минималната плата се зголемува за шест отсто споредбено со лани и за 35 проценти во однос на 2019 година