Унгарија гради втора ограда на границата со Србија

Унгарија почна да ја гради втората ограда на границата со Србија, со цел да го запре мигрантскиот бран во земјата, потврди денеска портпарол на унгарската Влада.

Властите во Унгарија веќе изградија ограда долж границата со Србија и Хрватска во 2015 година, а втората ограда, според нив, е потребна бидејќи оваа година се очекува поголем број мигранти да пристигнат до унгарската граница.

Шефот на кабинетот на унгарскиот претседател, Јанош Лазар изјави минатата недела дека Владата издвоила 130 милиони долари за изградба на ограда и кампови за мигранти.

Тој тогаш најави дека втората ограда, која засега ќе биде само на српско-унгарската граница, ќе биде изградена штом дозволат временските услови и завршена до крајот на пролетта.

Активистите за заштита на човековите права остро ја критикуваа унгарската миграциска политика, вклучувајќи ги и мерките со кои барателите на азил ќе се сместуваат во притворски кампови на границата додека не биде решено нивното барање.