Австрискиот канцелар разнесуваше пици

Австрискиот канцелар Кристијан Керн цела вечер разнeсуваше пици во Виена, за да „биде поблизок до избирачите и да ги дознае нивните проблеми“, што ги засили шпекулациите дека неговата Социјалдемократска партија на Австрија се подготвува за предвремени избори, јави ДПА.

Керн облече црвена униформа и им достави пици на неколку семејства, со кои потоа разговарал за политички прашања што го засегаат обичниот народ. Секако, сето тоа беше снимено, а видеото објавено на официјалната Фејсбук страница на канцеларот и за еден час собра речиси 70 000 прегледи.

Овој потег предизвика позитивни коментари, но имаше и такви кои тоа го нарекоа „пица популизам".

Австрија неофицијално е во предизборна кампања, иако редовните парламентарни избори се закажани дури за есента 2018 година.

Социјалдемократите и нивните коалициски партнери - десноцентристичката Австриска народна партија одрекуваат дека Владата планира предвремени избори.

Ако изборите во Австрија се одржат наесен наредната година, тие ќе се совпаднат со австриското претседавање со Европската Унија.