Димитриев: Рама сака да го подгрее национализмот на Балканот
Премиерот на Република Македонија, Емил Димитриев на својот фејсбук профил го обвини Премиерот на Албанија, Еди Рама дека има за цел да подгрее национализам на балканските простори:
“Додека мојот колега од Албанија „од ракав“ вади сценарија за спојувања на Албанија и Косово, доколку пропадне европската интеграција на државите од Регионот, негови дежурни адвокати се трудат да го правдаат со теза дека тоа што Рама бара домашни предизборни поени преку брутално мешање во македонските процеси биле од ''пријателска природа''.
Каква неодговорност од социјалист кој најотворено подгрева национализам!
Додека владее конфузност кај политичари во соседството дали сакаат да поддржат навистина пријателски дух во Регионот или не, сакам да им порачам дека ние, иднината на Македонија ја гледаме во Европската унија и немаме дилема во однос на овој стратешки приоритет.
Ваквите изјави не се во прилог на добрососедството и градењето пријателски односи. Напротив, додаваат масло на огнот кој тлее и ги разгоруваат националистичките чувства кај сите поединечно. Дури и Европската унија нема дилема дека иднината на државите од Регионот е во ЕУ. Само Рама со неговиот тим ги има и очигледно мисли дека со неговите алтернативи добива предизборно и ги покрива домашните слабости. Никакво територијално прекројување, обединување или разединување не е во насока на поголема стабилност и мир, ниту на просперитет.
Секоја држава од Регионот е суверена држава, a главна цел треба да и биде зголемување на стандардот на граѓаните, во сопствените граници.
Доколку сите работиме посветено на решавање на проблемите дома, полесно ќе можеме да се приближиме кон европското семејство. Зашто иднината на Регионот не е во обединувањето на две држави или повеќе територии, туку иднината е во обединувањето на сите околу европските вредности во Европската унија.“ - напиша Премиерот на Република Македонија.
