Хојт Брајан Ји: Треба да даде шанса на новото парламентарно мнозинство

Да се овозможи формирање влада со нова владина програма за да тргнат реформите, да се одвива бизнисот, редовно да се земаат плати. Ова е ставот што го делат САД, ЕУ, НАТО и Берлин, порача заменик помошникот државен секретар на САД Хојт Брајан Ји, кој престојува во Македонија.

– Потребно е политичките лидери, граѓанското општество и граѓаните да работат заедно во духот на соработката со цел да се залечат раните, не само оние што произлегоа од настаните во четвртокот во Парламентот, туку и оние од политичките недоразбирања кои траат предолго. Единствен начин тоа да се постигне е да се формира влада која ќе биде посветена на реформите што ќе ја доближат земјата до евроинтеграциите, изјави Ји по средбите во Скопје.

Повтори дека САД се посветени да и помогнат на земјата да ги заврши реформите со цел да се приклучи во ЕУ и во НАТО.

– Следниот чекор согласно денешните разговори со политичките лидери е да се надмине застојот, да се стави крај на кризата и да се оди напред, рече американскиот дипломат.