Заврши летната забава „Супер Скопје“
Со настапот на повеќе изведувачи на Боемската улица во Дебар Маало синоќа заврши четвртиот викенд, а со тоа и целосната програма од летната забава „Супер Скопје“.
Синоќа настапија Љубојна и Џамбо Ангушев Оркестар, Нино Величковски и Тамбураши.
„Супер Скопје“ траеше изминативе четири викенди на различни локации, на кејот „13 Ноември“, на плоштадот пред Свети Спас, во Старата скопска чаршија, на улицата „Македонија“ и на Боемската улица.
Жителите и посетителите на Скопје имаа можност да се забавуваат со настапите на голем број изведувачи, меѓу кои Сергеј Четковиќ, Бајага и Инструктори, Трикс, Гоца Тржан, Цена и Гоце САФ, Офкестра, Фанки Гуру, Енерџи бенд и Фиц (Студени нозе), Ди Џеј Дела, Ај Кју, Каролина Гочева, Тамара Тодевска и Нокаут со специјални гости – Игор Џамбазов и Гуру Харе, како и Влатко Илиевски, Синтезис и Фолтин.
Иницијативата за „Супер Скопје“, како што истакнуваат од Град Скопје, произлезе како предлог од сопствениците и менаџерите на угостителските објекти, а беше во насока на подобрување на состојбата со забавниот живот и понуда во Скопје.
Главен организатор на „Супер Скопје“ беше ЈУ „Конгресен центар Александар Македонски“, а за реализацијата беа задолжени „Горила Вајлд ентертејмент груп“.
Согласно одлука на Советот на Град Скопје, вечерите кога се одржуваше „Супер Скопје“, работното време на угостителските локали беше продолжено за еден час.
