Почнува 38-тиот Фестивал на филмска камера „Браќа Манаки“

Со македонската премиера на краткиот филм „Крајот на времето“ на македонскиот режисер Милчо Манчевски, а потоа и со премиерата на бугарско – македонската копродукција „Насоки“ на бугарскиот режисер Стефан Командарев, прв од филмовите во официјалната селекција, вечер во Битола ќе почне 38. издание на Интернационалниот фестивал на филмска камера „Браќа Манаки“.

Организаторите информираат дека подготовките за гала отворањето во Центарот за култура во Битола се завршени и оти градот се полни со љубители на филмот.

Според програмата, пред проекциите на филмовите, претседателот на државата Ѓорѓе Иванов, кој е покровител на фестивалот ќе му ја врачи наградата „Златна камера 300“ за животно дело на францускиот кинематографер Пјер Лом. Вториот добитник на наградата за животно дело, италијанскиот кинематографер Џузепе Ротуно заради својата возраст не дојде во Македонија.

За време на гала отварањето на фестивалот ќе се одржи и перформанс во режија на Нела Витошевиќ. Кореограф е Искра Шукарова, а ќе настапат актерите Сашко Коцев, Драгана Костадиновска, Денис Абдула, танчерот Агим Бафтии и студените од одделот за современ танц при Факултетот за музичка уметност од Скопје.

По свеченото отварање ќе биде прикажан филмот „Крајот на времето“ на режисерот Милчо Манчевски, а веднаш потоа публиката ќе ја проследи проекцијата на филмот во бугарско-македонска копродукција „Насоки“, чиј кинематографер е Веселин Христов. Копродуцент на овој филм кој беше прикажан во престижната програма „Извесен поглед“ во Кан, е „Сектор Филм“ на македонските продуценти Владимир Анастасов и Ангела Несторовска.

Годинашното издание на фестивалот има 10 различни филмски програми, 13 филмови во конкуренција за Златна, Сребрена и Бронзена Камера 300, меѓународното жири го предводи Пол Рене Ростад, кинематографер од Норвешка, а членови се: Лука Коасин, кинематографер од Италија, Јани – Петери Паси, кинематографер од Финска, Даријан Пејовски, режисер и сценарист, од Македонија и Ерол Зубчевиќ, кинематографер од Босна и Херцеговина.