Започна манифестацијата „Денови на кочанскиот ориз“
Дваесет и шестото издание на најголемата стопанско-културна манифестација во Кочани, „Денови на кочанскиот ориз“ започнаа синоќа со изложба на ликовни дела на членовите на Школата за цртање и сликање која работи при Центарот за култура „Бели мугри“.
На изложбата се поместени 86 дела работени во повеќе техники и претставува ретроспектива на најуспешните творби на младите ликовни творци од Школата за сликање и цртање, од кои дел се и наградени на меѓународни конкурси.
Манифестацијата продолжува со голем број настани на повеќе локации низ градот. Централните настани – Изборот на жетварска убавица, Меѓународниот фолклорен концерт и традиционалните обичаи ќе се одржат на 29 и 30 септември и на 1 октомври. На Изборот на жетварска убавица ќе настапи Сара Мејс, во сабота вечер на Оризовата бела вечер во Трговскиот центар ќе гостуваат Игор Џамбазов и Гуру Харе, а во недела во Паркот на Револуцијата ќе пее Ефто Пупиновски.
Годинава на манифестацијата ќе учествуваат фолклорни, ритмички и музички состави од Бугарија, Црна Гора, Унгарија, како и играорците од ФА „Етнос“ од Скопје и „Пере Тошев“ од Прилеп.
За време на манифестацијата во Кочани ќе престојуваат делегации од седум држави: Кина, Унгарија, Словенија, Хрватска, Бугарија и Република Српска.
