Рахој: Шпанската Влада го започна процесот на суспендирање на каталонската автономија

Шпанскиот премиер Маријано Рахој денеска најави дека Владата го отпочнува процесот на одземање на автономијата на регионот Каталонија.

– Одлуката е одговор на постапите на каталонската Влада, кои беа еднострани, спротивни на законот и со кои се бараше конфронтација, изјави Рахој во денешната прес конференција.

Рахој додаде дека шпанската Влада не сакала да го активира членот 155 од Уставот на Шпанија, кој предвидува одземање на автомонијата на регионалните власти, но дека Мадрид бил принуден на овој чекор.

Каталонија одржа референдум за независност на 1 октомври, кој шпанската полиција се обиде да го спречи со употреба на сила. Повеќе од 40 проценти од граѓаните сепак гласаа за независност и каталонскиите власти најавија прогласување на независност, оставајќи простор за дијалог со Шпанија.

Во својот денешен настап, Рахој побара распуштање на целата регионална власт во Каталонија. Шпанија бара одржување на нови регионални избори во Каталонија, на кои би се покажало дали сепаратистичките партии имаат мнозинство во регионалниот Парламент или не.