Кампања за собирање новогодишни подароци за деца од сиромашни семејства
Обезбедување новогодишни подароци за децата кои живеат во сиромаштија има за цел кампањата „И јас сум Дедо Мраз“ која почнува денеска. Подароците ќе можат да се донираат до 18 декември, а од 20 до 27 декември Дедо Мраз ќе им ги однесе подароците на околу 200 дечиња за кои се собираат подароците.
– Целта ни е што повеќе луѓе, особено јавни личности кои имаат голем број следбеници на социјалните мрежи да се приклучат кон оваа кампања, да ја промовираат и да станат дел од неа. Ги поканивме нашите пријатели од јавниот живот од 1 до 10 декември, да купат новогодишен подарок или онолку колку што можат подароци, за деца до 11 години. Ги замоливме подароците убаво да се завиткани, и на нив да стои за која возраст е и од кој пол е детето. Потоа, фотографии од подароците да се објават на социјалните мрежи со хаштаг #ијассумдедомраз #проектсреќа. На тој начин, јавните личности ќе ги мотивираат сите граѓани, но и компаниите и институциите да го сторат истото, изјави Кристина Арнаудова, основач на здруженито „Проект Среќа“ кое е организатор на кампањата.
Подароците се донираат до 18 декември, во канцелариите на Здружението на улица Христо Смирненски бр. 4/5, во близина до Универзалната сала. За сите информации, обратете се кај координаторот на проектот Благица Ристов, на телефонскиот број 078-405-264.
Од 20 до 27 декември Дедо Мраз ќе ги посети децата во нивните домови , а на списокот има повеќе од 200 дечиња. Учество во проектот „И јас сум Дедо Мраз“ веќе потврдиле повеќе наши јавни личности: пејачи, актери, спортисти, политичари.
