Името „Македонија“ останува неприфатливо за Каменос

Грчкиот министер за одбрана Панос Каменос, коментирајќи ги последните случувања во разговорите меѓу Скопје и Атина, изјави дека неговата партија Независни Грци, која е помал коалициски партнер во Владата на Грција, нема да прифати зборот „Македонија“ да биде содржан во името на северниот сосед, објави електронското издание на „Катимерини“.

Каменос вчера при посетата на воениот камп Далипи во Солун, рекол дека остануваат на позицијата утврдена во 1992 година на средбата на партиските лидери под покровителство на тогашниот претседател Константин Караманлис дека терминот „Македонија“ во името на соседната држава не е прифатлива опција за Грција. За промена на таа позизиција, според него, ќе биде неопходен нов состанок со сегашниот претседател Прокопис Павлопулос, пренесува МИА.