Дедомразовска трка во Скопје

Во центарот на Скопје денес напладне се одржа традиционалната дедомразовска трка во која учесниците се облечени во костуми на Дедо Мраз.

Трката ја организира здружението за спорт и рекреација „Прв до врв“. Годинава трката броеше околу 300 граѓани, а учесниците беа од сите возрасти, мажи и жени.

Почетокот и крајот на трката беа во паркот „Жена-борец“, а се трчаше кон мостот кај МНР, покрај Вардар до Камениот мост и преку плоштадот „Македонија“ до целта.

Должината на патеката е два километра. Дедомразовска трка низ улиците на Скопје се организира веќе четврта година по ред.

Трката е од спортско-рекреативен карактер, а може да учествува кој сака без разлика на полот и годините. Според правилата, најмалите може да трчаат само во придружба на нивните родители.