Нова кривична пријава за поранешниот градоначалник на Ново Село
Поранешниот градоначалник на општина Ново Село Б.В. (53) доби кривична пријава поради сомневање дека ја „злоупотребил службената положба и овластување“ и со Анекс на договор продолжил закуп на времен објект на Смоларски водопади со правното лице – Друштво за туризам, угостителство и услуги од Струмица, со што овозможил тоа да биде во повластена положба на пазарот и со поголема имотна корист и афирмација за подолг временски рок.
– Б.В., како градоначалник на општина Ново Село, на 7 март 2014 година, злоупотребувајќи ја службената положба и овластување, склучил Анекс кон Договорот за закуп на времен објект, со кој го продолжил рокот на времетраење од пет на 11 години. Пријавениот, пред истекување на Договор за закуп на времен објект на Смоларски водопад, склучен помеѓу општина Ново Село и закупецот – правно лице од Струмица, без спроведување јавно надавање и јавен оглас за издавање под закуп на обејкт, му го продолжил користењето на обејктот, сопственост на општина Ново Село, на 11 години, информираат од МВР.
Со потпишување на Анексот, Б.В. дозволил преуредување на постоечки објект во национален ресторан и изградба на неделиви објекти од тврда градба, спротивно на условите во претходно објавениот оглас за јавно надавање за издавање под закуп на времен објект и спротивно на потпишаниот договор за закуп на времен објект.
На тој начин, како што информира МВР, овозможил правното лице – Друштво за туризам, угостителство и услуги од Струмица, да биде во повластена положба на пазарот и со поголема имотна корист и афирмација за подолг временски рок.
