Одбележување на првата годишнина од канонизацијата на св.Кипријан Слепченски

Првата годишнина од канонизацијата на св. Кипријан Слепченски ќе биде одбележана утре во манастирот „Св.Јован Претеча“ во демирхисарското село Слепче.

По тој повод во 08:45 часот ќе се одржи литургија, а моштите на Светителот ќе бидат изложени од 07:30 часот пред кои ќе може да се поклони верниот народ и сите добронамерници кои ќе го посетат манастирот.

Во дворот на манастирската црква ќе се одржи програма во рамки на која во 11 часот ќе се обрати митрополитот преспанско-пелагониски г. Петар и градоначалникот на општина Демир Хисар, Марјанче Стојановски. Ќе се одржи рецитал „Св.Кипријан” и пригодна музичка програма.

Светиот свештеномаченик Кипријан бил игумен на Слепченскиот манастир повеќе од триесет години во XVIII век. Тој бил добар познавач на словенското писмо и мудар и верен економ на манастирот. Се упокоил на Велигден во 1780 година.