Општините Гевгелија и Пеонија ќе ја продолжат прекуграничната соработка

Градоначалникот на Гевгелија, Сашо Поцков, денеска оствари работна средба со својот колега од грчката општина Пеонија, Христос Гунденудис со кого разговараа за досегашната заедничка соработка, како и можната идна соработка на различни полиња меѓу овие две погранични општини.

Градоначалникот Поцков нагласи дека со колегата Гунденудис разговарале пред се за текот на реализацијата на заедничкиот проект АКВА 2 кој е финансиран со 518.000 евра од европските фондови, со кој општина Гевгелија ќе го регулира коритото на Сува Река.

- Конкретно преку вакви средби даваме пример на добрососедска соработка и ја потврдуваме нашата определба на нашиот пограничен регион да му дадеме значење на „еколошки регион“ истакна Поцков.

Градоначалникот на Пеонија истакна дека со својот колега извршиле размена на искуства и се договориле како да тече натамошната соработка.

- Сакаме да соработуваме не само преку европските фондови, туку и да се вложиме во развојот на секојдневните комуникации на граѓаните од двете општини. Сакаме нашите општини да одат напред, да соработуваме на сите полиња и да придонесеме за подобар живот на нашите граѓани, рече Гунденудис кој изрази и голема благодарност за топлото гостопримство во Гевгелија.