Во Прилеп се одржа традиционалната манифестација „Сите на велосипед“
Над 400 учесници, љубители на велосипедот денеска се вклучија во манифестацијата „Сите на велосипед“, која, по повод 24 мај, Денот на сесловенските просветители Кирил и Методиј, по 13-ти пат се одржа во Прилеп.
Манифестацијата е во организација на велосипедскиот клуб „Илинден“, Сојузот на училиштен спорт на Прилеп и Велосипедската федерација на Македонија, а под покровителство на прилепската локална самоуправа.
Претседателот на велосипедскиот клуб „Илинден“, Драган Димитријоски рече дека Прилеп е единствениот град во кој се одржува ваква манифестација, на која љубителите на велосипедизмот возат рекреативно од центарот на Прилеп до спортскиот аеродром во с. Мало Коњари и назад.
- Манифестацијата „Сите на велосипед“ е традиционална и единствена во Прилеп. Бројот на учесници е секогаш голем, овојпат се преку 400 велосипедисти, рече Димитријоски на почетокот на ова рекреативно празнично дружење.
Дел од учесниците во оваа манифестација беше и градоначалникот Илија Јованоски, кој ја нагласи важноста од возењето велосипед не само за натпреварувачки цели, туку и за рекреација.
- Возењето велосипед го зајакнува здравјето и духот посебно кај младите луѓе, со него побрзо ќе стигнете на крајната дестинација од кое било друго моторно возило. Велосипедот е важен од еколошки аспект и секогаш е поевтино да се патува со велосипед. Сакам да го честитам денешниот празник 24 мај, Денот на сесловенските просветители „Кирил и Методиј“ и именденот на сите што го слават, рече Јованоски.
