Штипската Клиничка болница ќе добие две нови возила

Во штипската Клиничка болница утре ќе се промовираат двете нови амбулантни возила, кои преку грант од Јапонската амбасада ги обезбеди Центарот за развој на Источен плански регион (ИПР).

Александар Николов координатор на проектот при Центарот за развој на ИПР, вели дека преку Програмата Грасрут проекти за човечка безбедност се обезбедени двете нови амбулантни возила.

- Со новите возила значително ќе се подобри возниот парк на болницата, но и ќе се пружи соодветна медицинска нега на жителите од Источниот и Вардарскиот регион. Новите амбулантни возила во вредност од 40.262 евра се со целосна опрема, со што целиот транспорт и нега, кај пациентите ќе биде на многу повисоко ниво, вели Николов.

Преку Програмата Грасрут проекти за човечка безбедност до сега Општина Штип има искористено 191.783 евра, а општините во Источниот плански регион повеќе од половина милион евра. Од оваа програма парични средства за реконструкции на објектите имат добиено регионалното Државно средно училиште за специјално образование и воспитание „Искра“- Штип, Средното медицинско училиште „Јане Сандански“ - Штип и Основното „Ванчо Прќе“ во Делчево.