Во центарот на Штип интензивно се гради новата платформа за паркирање

Новата платформа за паркирање на возила, која се гради над коритото на реката Отиња, кај Трговскиот центар во Штип ќе биде изградена за еден месец, информираше на денешната прес-конференција градоначалникот на Општина Штип, Благој Бочварски. Со изградба на оваа платформа се обезбедуваат 50 нови паркинг места во центарот на градот. Вредноста на проектот изнесува 7.827.733 денари со вклучено ДДВ.

- Денеска се наоѓаме во централното градско подрачје кадешто веќе неколку дена и недели во тек е изградба на новата платформа со паркинг простори во централното градско подрачје. Тоа е една од мерките којашто ја превземаме за растеретување на сообраќајниот хаос во центарот на градот. Сведоци сме дека во изминатиот период, а и денеска се поголем проблем е паркирањето во општина Штип и ние како Општина не смееме да останеме неми и да гледаме како овој проблем станува се поголем, рече Бочварски.

Тој истакна дека се прави и испитувања за изградба науште една паркинг платформа кај Спортско рекреативниот центар „Џексон“ која што дополнително ќе го олесни паркирањето на граѓаните на Општина Штип.