Социјална зграда со 39 станови ќе се гради во Виница

До крајот на годинава во Виница ќе започне изградба на социјална зграда со 39 стана за лицата од ранливите категории.

Објектот е влезен во годишната програма на Министерството за транспорт и врски за финансирање вакви објекти, а според техничката документација становите ќе бидат со површина од 35 до 45 метри квадратни.

- Веќе е определена локацијата на социјалната зграда во близина на комуналното претпријатие „Солидарност“. Исто така, општината обезбеди градежна маркица и парцела до која има улица и друга комунална инфраструктура, со што се создадени сите услови за градење, рече градоначалникот на Виница Ивица Димитров.

Во тек е тендерската постапка за избор на изведувач и по нејзиното завршување ќе стартуваат градежните работи.

Социјалните станови што ќе можат да се користат по цена од 15 денари за метар квадратен, а во министерствата за транспорт и врски и за труд и социјална политика треба да се усогласат критериумите според кои ќе се прави распределбата на становите.

Освен во Виница, социјални згради треба да добијат Свети Николе и Пехчево со по 34 стана, Пробиштип со 48 стана, а околу уште 300 ќе се градат во Скопје.