Австриската амбасадорка Коблер во посета на Куманово

Амбасадорот на Австрија, Ренате Коблер денеска се сретна со градоначалникот на Куманово, Максим Димитриевски. На средбата стана збор за можната, идна соработка на културен и економски план.

Амбасадорката Коблер истакна дека е задоволство да се посети општина Куманово, нагласувајќи дека ова е прва посета откако овој месец Австрија го презеде претседавањето со ЕУ. Таа изрази задоволството од посетата и информираше дека разговарале за повеќе теми, меѓу кои и за мултиетничноста на Куманово и за економските прашања.

- Можам да ве уверам дека предизвиците со кои се соочува Куманово ги дели со остатокот од Европа и со Австрија. Сакам да порачам дека Македонија никогаш не била поблиску до ЕУ, отсега и дека Австрија ја има ставено на врвот од својата приоритетна листа, рече амбасадорката.

Градоначалникот Димитриевски истакна дека со амбасадорката разговарале и за можна културна сорабтка, но и за економска соработка со одредени правни субјекти од Куманово.

- Беа отворени теми и со австриското претседателство со ЕУ и најавената поддршка од нивна страна и за Република Македонија и за општина Куманово. Разговаравме и за Куманово, што значи градот за Република Македонија, поради мултиетничноста, како се развива, шири, за идните проекти, заштитата на животната средина и она што значи модерно и урбано живеење, додаде Димитриевски.