Општина Василево ќе го реализира проектот „Мис Стон“

Советот на општина Василево на денешната единаесетта седница донесе одлука со која се одобрува кофинансирање од страна на општината за спроведување на проектот „Нераскажаната приказна за американската мисионерка - МИС СТОН“.

Вкупната вредност на оваа инвестиција изнесува 17 милиони денари од кои 14 милиони и 280 илјади денари се побаруваат како подгрант од Проектот за локална и регионална конкурентност и како дотации од Европската унија, како и сопствено учество на општина Василево во износ од 2 милиони и 720 илјади денари.

Советниците со мнозинство гласови донесоа одлука за утврдување на потребата од донесување урбанистичко-планска документација заради вклопување на бесправно изградени објекти во планскиот опфат.

На денешната седница беа донесени и измените и дополнувањата на годишниот план за вработување на општина Василево за 2018 година, а беа разгледани и неколкуте барања за финансиска помош поднесени до Советот.