Надал: Тенисот е непредвидлив, за Ѓоковиќ пред два месеци се говореше дека е очаен

Шпанскиот тенисер Рафаел Надал пред турнирите во Северна Америка изјави дека тенисот е непредвидлив спорт и дека само пред два месеци за Новак Ѓоковиќ се говорело дека игра очајно.

- Роже Федерер ја освои Австралија, Ѓоковиќ победи на Вимблдон, а јас на Ролан Гарос. Сите играме во највисока форма, иако пред два месеци се говореше дека Ѓоковиќ е очаен. Тоа говори колку овој спорт е непредвидлив, истакна Надал.

Актуелниот најдобар тенисер во светот вели дека сега се наоѓа во фаза од кариерата кога победите се најважни, меѓутоа натпреварите со квалитетен тенис се она што го прави среќен.

Во однос на Ѓоковиќ и Федерер како негови двајца најсериозни ривали, Надал потенцира дека е зачудувачки колку време се задржале на врвот сите тројца.

- Тоа е голема случајност која никогаш не се случила во историјата. Бевме на врвот толку години. Постојат само две опции тоа да се објасни, или ние тројцата сме биле толку посебни или останатите биле многу под нивото. Навистина не го знам вистинскиот одговор. Порано или подоцна ќе се појави некој подобар од нас, потенцира шпанскиот тенисер.

Надал во моментов се наоѓа на Мајорка каде се подготвува за американската турнеја.