Подобрени условите во сите објекти на СЦ „Борис Трајковски“

Изминатиов период интензивно се работи на подобрување на услугите во сите објекти во Спортскиот центар „Борис Трајковски“ со цел македонските спортисти и рекреативците да постигнуваат подобри резултати.

Од СЦ информираат дека се реновирани и „освежени“ базенот, аква паркот, арената за која е е планирано да се обезбеди и модерен семафор.

-Во „vip БАЗЕНОТ“ се санираше кровната конструкција, се изврши реконструкција на електро инсталацијата и подобрување на осветлувањето, “vip Аква паркот” доби нов лик со комплетно нова опрема, отворен е третиот шанк, зголемен е бројот на лежалки, има и многу други мали новитети за целосно опуштање и забава на целото семејство. Во моментов се завршува реновирањето на соблекувалните во “vip АРЕНАТА” кои што добија сосема нов и модерен лик, од кои едната е ВИП соблекувална и истата е во завршна фаза од реновирање, соопштија од СЦ.

Исто така убрзано се работи на обезбедување на услови за монтирање на новиот централен семафор во “vip АРЕНАТА” кој што се надеваме дека ќе биде поставен до почетокот на Лигата на шампионите во ракомет во септември. Тоа ќе биде првиот семафор во Македонија од таков тип. Понатаму во план е средување на озвучувањето и осветлувањето, трибините, позиции за новинарите и многу други работи со кои што СЦ БОРИС ТРАЈКОВСКИ ќе продолжи да биде најрепрезентативниот спортски објект во Република Македонија, информираат од „Борис Трајковски“.