Денот на независноста одбележан во Куманово
По повод 8 Септември, Денот на независноста на Република Македонија денеска делегации од Собранието, АРМ, МВР, Здружението на борците, од општина Куманово, од Советот на општината, политички партии, претставници на граѓански здруженија, установи и институции положија цвеќе пред споменикот Жена борец на градскиот плоштад во Куманово.
На присутните им се обрати претседателот на Советот на општина Куманово Атина Мургашанска која се осврна на историскиот стремеж на макеоднскиот народ за самостојна и независна Македонија, потенцирајќи го референдумското изјаснување на граѓаните во 1991 година.
- Љубовта кон татковината е нашето вчера, денес и утре. Мерка за нашиот патриотизам се нашите дела, напорот за среќа и слобода на секој поединец и сите заедно, а не празни зборови во вакви или слични пригоди. Градиме еднакво општество за сите, во кој правдата и просперитетот се поеднакво достапни за секој. Вложуваме во иднина која значи напредок и подобар живот за нашите граѓани, рече Мургашанска.
Таа нагласи дека сега е шанса на Македонија да напише нова страница во својата историја.
Пред присутните се одржа и кратка уметничка програма во која учествуваа актерката Габриела Петрушевска и пејачот Марио Арангеловски. Денот на независноста општина Куманово го одбележува со културни и спортски манифестации.
