Видеото на екстремистичката група која бара „запирање на трговијата со територии“ било старо

Холандскиот новинар со албанско потекло Винсент Триест, кој на Твитер објави видео на вооружена екстремистичка група што себеси се нарекува Албанска национална армија (АНА) и во кое од албанската и од косовската влада се бара да не „тргуваат“ со територии, денеска информира дека станувало збор за стар запис.

- Моите твитови за пораката на АНА беа базирани на една стара снимка, што ми ја испрати некој на кого му верував. Жал ми е што на Твитер објавив старо видео, тоа беше грешка, објави Триест на социјалната мрежа.

На видеото, кое во меѓу време е отстрането од Твитер, вооружени и маскирани лица на албански јазик им порачуваа на политичарите да престанат да продаваат или тргуваат со територии за свои лични интереси. - Мора веднаш да прекинат разговорите за трговија на териториите на Северна Митровица и Прешевската Долина, порачуваа екстремистите во видео записот.