Кривопаланечките извидници мапираат диви депонии на Калин Камен

Со денешните теренски активности на членовите на извидничкиот одред „Наум Наумовски Борче“ од Крива Паланка ќе се спроведе комплетното мапирање на дивите депониии на туристичкиот локалитет Калин Камен.

-Триесетина извидници во изминатите два дена активно работеа во реонот на туристичкиот локалитет Калин Камен, во околината на спортско-рекреативното катче, излетничките сместувачки капацитети и најпосетуваните локации во оваа месност, а денеска ќе обиколиме по трасата на патеката до езерцата и врвот Калин Камен, како и на неколкуте видиковци, каде најчесто се заджуваат оние кои го посетуваат прекрасниот Осоговски предел и Калин Камен, истакна Соња Ангеловска од ИО „Н.Н. Борче“.

Ова е трета последователна активност на здружението од проектот „Младински платформи за одржлива заштита на прородата“, финансиски поддржан од општина Крива Паланка со повикот за финансирање граѓански организации од Програмата за 2018 година.

- Активноста се спроведува во вид на хајки на кои учествуваат повеќе групи млади лица од општината, а основната цел на активностите е мапирање на дивите депонии на локалитетот Калин Камен, подготовка за нивно отстранување и подготовка на промотивен видео материјал за подигнување на свеста кај граѓаните за зачувување на животната средина, додaва Ангеловска.