Во Штип доделени признанија на најдобрите наставници
По повод Светскиот ден на учителот денеска во oпштина Штип се одржа Свечена академија на која им беа доделени прзинанијата на најдобрите наставници во основните и средни училишта и воспитувачи во детските градинки.
Градоначалникот Благој Бочварски во своето обраќање пред наставниците истакна дека Штип е град до долга просветителска дејност, каде што е отворена и правта учителска школа, а во него учителствувале и Гоце Делчев, Даме Груев и Ѓорче Петров.
- Од наставниците ќе побарам и во иднина да работат во насока на образување на младите луѓе во општината и државата, со што ќе го унапредиме образовниот процес и целото општество. Образовниот процес е најважната алка во општеството и знаеме дека во овој град, во општина Штип учителствувале едни од најпознатите дејци, вели Бочварски.
Раководителката на Секторот за јавни дејности во општината, Билјана Казанџиска истакна дека денеска е голем ден за околу 500 наставници во штипските училишта. Смета дека современиот начин на живеење ја наметнува и улогата на учителот да го трасира патот на ученикот.
Наставничката по македонски јазик и литература во ООУ „Гоце Делчев“-Штип, Марија Ристова е една од наградените наставници на ниво на Општина Штип.
- Секако дека учителската професија е благородна, односно учителот е тој модератор, кој не само што го води воспитно-образовниот процес, тој во денешно време е и креатор, иноватор и секако неговото знаење треба да го пренесе на своите ученици, вели Ристова.
На денешната Свечена академија во Општина Штип присуствуваше и ректор на Универзитетот „Гоце Делчев“ - Штип, Блажо Боев и универзитетски професори, како и учители, кои веќе се пензионирани.
