Во општина Гевгелија одбележан европскиот ден на соработка

Претставници на општина Гевгелија денеска остварија средба со штитениците на центарот за деца со посебни потреби „Мајка Тереза“ по повод денот на Европска соработка.

Во Домот, кој е наменет за индивидуална работа и третман на граѓани од оваа категорија, децата беа запознаени со изведбените работи на излетиштето „Динќут“ каде ќе бидат уредени повеќе содржини за рекреација, посебно за најмладите вклучувајќи ги и децата со посебни потреби. Меѓу содржините, беше посочено, ќе се најдат многу реквизити и опрема за забава на деца како трамбулина, тобоган, лулашки, вештачка карпа за искачување, игралиште за мал фудбал, фитнес зона и летно кино.

Покрај овој, општина Гевгелија во моментот е лидер партнер на уште еден проект финансиран од ИПА во рамки на прекуграничната соработка на Македонија и Бугарија.

Центарот за деца со посебни потреби во Гевгелија е единствениот во земјата чија основна цел е зголемување на социјалната интеграција и развојот на децата со посебни потреби. Во него се вклучени 30 лица со различни попречености кои добиваат индивидуални часови со стручни лица и програми кои вклучуваат успешни и признати светски методи со докажани резултати и успеси во работењето.

Општина Гевгелија ги подржува ваквите проекти и со фондацијата „Аполонија“ веќе учествуваше во уредувањето и отворањето на сензорната и терапевтската соба за децата со посебни потреби во Гевгелија.