Делчевските советници ги прераспоредија средствата од буџетот за 2018
Советот на општина Делчево донесе одлука за измена на распоредот на средствата во Буџетот на Општината за 2018 година. Како што информираше Анка Христова од Одделението за финансии и буџет, со одлуката за измена на распоредот на средствата на Буџетот за 2018 година е извршено распоред на средствата на сметката за донација за проектот „Енергетски ефикасно осветлување во регионот Благоевград-Делчево“ финансиран од ИПА-компонентата за прекугранична соработка, Република Македонија-Република Бугарија. - Пренамената е изготвена заради помалку пресметаните средства на погоренаведените конта и повеќе планираните средства на 482.110, кои беа предвидени и во буџетот за 2017 година. Истите мораше да ги предвидиме и во буџетот за 2018 година, бидејќи се до донесувањето на буџетот за 2018 година средствата не пристигнаа, туку истите беа пристигнати и исплатени на крајот на буџетската година. Исплатите за проектот по сите основи треба да бидат завршени на 16 октомври 2018 година, и затоа е потребно донесување на одлуката од страна на Советот на општината, со цел навремено сервисирање на извршените работи како и исполнување на обврските спрема донаторот, согласно динамиката на проектот и навремено затварање на истиот, образложи Христова. Советниците на 14. седница донесоа и одлуки од областа на урбанизмот, како и одлука за дополнување на програмата за поставување урбана опрема на територијата на град Делчево со намена самостоечки рекламни паноа и информативни табли.
