Герберих: На дневна основа околу 100 македонци бараат работни дозволи за во Германија

Германскиот амбасадор Томас Герберих за време на денешниот престој во Битола се сретна со градоначалничката Наташа Петровска и разговараа за инвестициите на германските компании во таа општина.

Од секторот за односи со јавност на општина Битола информираат дека амбасадорот се интересирал и за соработката во сферата на високото образовние и за одржувањето на историските споменици во Битола каков што е споменикот Германски гробишта, масовна гробница на загинатите војници од првата светска војна.

Амбасадорот Герберих присуствуваше и на одбележувањето на јубилејот 25 години од формирањето на германско-македонското друштво за соработка кое под претседателство на битолчанката Валентина Илиева, работи во овој град.

Амбасадорот на Германија додава дека: Повеќе од 100.000 македонци живеат во Германија и дека очекува бројот на македонци кои ќе одат во Германија ќе биде уште поголем. Како што кажа, на дневна основа барање за работна виза поднесуваат од 80 до 100 лица.