Универзитетот „Мајка Тереза“ ќе добие технолошки парк

Технолошки парк ќе функционира на Универзитетот „Мајка Тереза“ во Скопје, за што оваа високообразовна установа ќе добие средства од Министерството за економија. Договорот за кофинансирање на проектот, кој е мерка од Програмата за конкурентност, иновации и претприемништво во 2018 година, денеска го потпишаа ректорот Азиз Положани и министерот Крешник Бектеши.

Бектеши рече дека мерката е во согласност со објавениот повик со кој се кофинансира проект за основање технолошки парк во рамки на универзитетите во Македонија, и тоа 75 проценти од потребните средства, но не повеќе од 1,5 милион денари.

– По овој јавен повик пристигна само една апликација – од Универзитетот „Мајка Тереза“. Таа беше разгледана од комисија која донесе одлука дека апликантот ги исполнува условите и ја добива финансиската поддршка, рече Бектеши на потпишувањето ан Договорот и, како што рече, очекува наскоро да почне реализацијата на проектот.

Целта на отворањето технолошки паркови е трансфер на технологии, поврзување на компаниите со академската заедница и подготовка на стдентите за вклучување во реалниот бизнис, унапредување на иновациите, со крајна цел – зголемување на економската моќ на земјата.

– За успехот на оваа идеја и основање на технолошкиот парк се заслужни професорите од Техничкиот и Технолошкиот факултет, но пред се Министерството за економија кое во нашиот проект препозна и сериозен ангажман за негова реализација и финансиски не поддржа , рече ректорот Положани.