Санацијата на железничкиот мост кај Стоби брзо ќе биде завршена

Деновиве се очекува да заврши санацијата на мостот кај архолошкиот локалитет Стоби поради кој од почетокот на овој месец во прекин е железничкиот сообраќај кон Гевгелија.

Премиерот Зоран Заев при посетата на Стоби одговарајќи на новинарски прашања информира дека е интервенирано и оти во прашање се денови.

– Јас верувам дека денови се во прашање заради тоа што ова навистина е една од најважните железнички трансверзали за Европа, а секако најважно овде е Солунското пристаниште, поминува низ Македонија, кон Белград, Париз итн. Верувам дека овие денови ќе биде и привршено заради тоа што Владата донесе брза одлука и веднаш обезбедивме средства и колку што сум информиран реконструкцијата е отпочната, нагласи Заев.

Мостот беше оштетен од надојдената вода на Црна Река при што штета претрпе еден од столбовите, по што беше забранет железничкиот сообраќај од Велес до Гевгелија.