Фетел ќе му помогa на Леклер

Лидерот на Ферари, Себастијан Фетел сака да му го предаде своето искуство на својот нов тимски колега за 2019 година, Шарл Леклер. Toj дебитираше оваа година во Формула 1 за тимот на Заубер, кој е клиент на погонските единици на „Скудерија“, а од почетокот на предсезонските тестови ќе го замени Кими Раиконен.

Фетел верува дека и двајцата мора да работат како партнери на патеката и да го развијат новиот автомобил со тимот, ако сакаат да направат нешто во следниот шампионат.

Себастијан очекува младиот Шарл (21) да стори сé за да го порази и да го импресионира целиот свет, но призна дека истото важи и за самиот него.

– Ќе биде многу различно, тоа е сигурно. Шарл не е Кими и Кими не е Шарл. Тој е младо момче и го очекуваат многу тешкотии во Ферари. Барањата, очекувањата и тензиите тука се највисоки во Формула 1 и ќе мора брзо да се прилагодува од она што го правел во Заубер. Тој нема искуство, но тоа не е кривично дело, бидејќи на неговата возраст нема како да е поинаку. Јас бев исто како него кога дебитирав во Формула 1, и дури бев помлад. Знам како луѓето се сомневаа дали сте доволно зрели за да ја носите оваа голема одговорност сами, доколку екипата зависи од вашите активности. Ќе му пренесам искуството и ако двајцата работиме како тим на патеката и заедно со инженерите на развојот на новиот болид, можеме да очекуваме силно претставување во 2019 година, прокоментира Фетел.

Тој додаде дека е нормално тоа Леклер да си поставил за цел да го победи следната година.

– Го разбирам целосно, бидејќи на тој начин ќе го импресионира целиот свет и ќе се утврди. Од друга страна, за сите е јасно дека и јас ќе се стремам да го победам, едноставно тоа е првата задача на сите тимски колеги во мотоспортот, заврши четирикратниот светски шампион.