Турција разговара со ОН за истрага за убиството на Кашоги

Турција разговара со Обединети нации за истрага за убиството на саудискиот новинар Џамал Кашоги, изјави денеска шефот на турската дипломатија Мебљут Чавушоглу.

– Пристигнуваат барања за меѓународна истрага, ние ги продолжуваме разговорите со ОН. Нашите очекувања се дека ништо од тоа нема да биде неопходно и дека Саудиска Арабија ќе соработува за да се дојде до одговорите, истакна Чавушоглу.

Високата комесарка на ОН за човекови права Мишел Башеле минатата недела изјави дека е неопходно да се покрене меѓународна истрага со цел да се утврди кој е одговорен за убиството на Кашоги, кој беше елиминиран во Генералниот конзулат на Саудиска аАрабија во Истанбул на 2 октомври.