Изложба на сликарката Елизабета Наумческа во Гостивар

Гостиварската сликарка Елизабета Наумческа го престави нејзиниот последен опус на изложба што беше отоврена синоќа во галеријата на Центарот за култура „АСНОМ“.

Преставени беа 24 дела во акрил и маслени бои на платно и картон за кои сликарката кажа дека се работени во два циклуса – мртва природа и портрети, поврзани со елементи на фолклорот и метални декорации низ делата.

– Елизабета досега повеќе е позната по црковното сликарство со религиозни теми во бројни верски објекти цркви и манастири, но не изостанува и нејзиното профано ликовно творештво. На изложбата се претставува со дела каде што најлесно и најдиректно може да ја изрази својата ликовна филозофија и естетика и во главно се карактеризира со дела реализирани во два циклуса: Мртва природа и портрети, мотиви кои во ликовната уметност се антологиски. Колоритот е со богати тонови кои се реализирани со суптилни прецизни потези, беше речено на отворањето на изложбата.

Елизабета Наумческа е родена 1973 година во Гостивар. Дипломирала на Факултетот за ликовна уметност во Скопје, отсек сликарство, во класата на проф. Родољуб Анастасов. Остварила две самостојни изложби и учесник е на повеќе колективни изложувања во земјава и странство. Работи како ликовен педагог во Гостивар.