Самостојна изложба на Африм Спахиу во Чифте амам

Во организација на Националната галерија (НГМ), вечер во 19 часот во Чифте амам ќе биде отворена изложба на уметникот Африм Спахиу (1951), кој е роден во Дебар, а живее и работи во Приштина.

-Спахиу е исклучително значаен автор за историјата на македонската уметност, основоположник во сферата на современиот балкански филм – директор на фотографија и истакнат фотограф во регионот со редица самостојни изложби во значајни галериски простори во регионот и пошироко. Oва е негова прва голема презентација во Македонија, каде ќе бидат изложени дела од изминатите речиси педесетина години од неговото творештво. Неговиот опус опфаќа широк дијапазон на тематски преокупации, диверзни технички пристапи и идејни цели на реализација на осетливата светлина на хартијата, соопшти НГМ за изложбата на Спахиу која ќе може да се посети до 4 мај.

Африм Спахиу е професор, фотограф и продуцент. Дипломирал на Академијата за театар, филм и телевизија на Универзитетот во Загреб. Работел во Радио-телевизија Приштина и како директор на фотографија во „Косовафилм“. Директор на фотографија е на повеќе од 15 филмови од 1977 година до денес и е добитник на неколку награди.