Промовирана збирката „Со хумор и мудрост кон човечност“

„Со хумор и мудрост кон човечност“ е насловена збирката од пензионираниот наставник Ѓорѓи Лазов, која синоќа беше промовирана во Кавадарци.

– Човечноста е тема за која вреди да се пишува, наша цел постојано треба да биде тоа, како да се дојде до се поголема човечност, рече Лазов за МИА.

Тој има 78 години. Ова е негова четврта збирка. Меѓу претходно објавените се и „Сјајот на хуморот и мудроста“ и „Да ги заштитиме децата во сообраќајот“.

Збирката се состои од четири циклуса во кои се прелеваат поетски и прозни текстови.

– ​Позната е изреката дека мудроста, за жал, доаѓа со староста. Но, преку литературните дела како ова, на несомнено мудриот писател, имаме можност да стекнеме мудрост без да доживееме горки искуства. Човекот може да биде мудар иако е млад и неискусен, ако е доволно паметен да ги проучи пораките од старите мудреци. Возраста е релативна величина, а мудроста е универзална и му припаѓа секому и се наоѓа насекаде околу нас.

Тоа е целта на овој труд, да предизвика катарза и воздигнување на сите, независно дали се во периодот на детството, младоста или во така нареченото трето доба.

– Правдината и добрината, а со тоа и човечноста и мудроста се основни вредности во животот и тие го прават животот убав и вреден, нагласи рецензентот Влатко Тасев, професор по македонски јазик во средното земјоделско шумарско училиште во Кавадарци.

Психологот Ратка Кулева, исто така рецензент, за збирката пишува дека хумористичните мудрости имаат многу важна вредност што може да не носи во еден позитивен животен стил со чувство на среќа, задоволство што води кон рационален приод на подмладување, бидејќи хуморот води и кон зацврстување на пријателства и извлекува од депресивни чувства.

Издавач е градската библиотека „Феткин“. Во своето обраќање, директорката Весна Гркова се осврна кон претставување на авторот. Рече дека она што се проткајува во сите негови збирки е оптимизмот и намерата да ги развесели читателите.

Делови од збирката читаа ученички од земјоделско-шумарското училиште и пензионерки од поетскиот клуб при Здружението на пензионери. Вечерта беше збогатена и со музичка изведба.