Вработените на Еуроникел Индустри со освоени први места го потврдуваат тимскиот дух
Вработените на Еуроникел Индустри ги освоија најважните трофеи во тимските дисциплини на 9тите работнички спортски игри организирани од Синдикатот на Индустријата, Енергетиката и Рударството СИЕР.
На годинешните работнички игри, вработените на Еуроникел Индустри учествуваа првпат по подолга пауза предизвикана, пред се од недостатокот поддршка од претходните сопственици и раководства на фабриката за никел во Кавадарци, но и од стечајната постапка. Поради овие причини е важно што тимскиот дух го манифестираа токму преку освојување две први места во екипните, тимски дисциплини, фудбал и влечење јаже.
Претседателот на Синдикалната организација на Еуроникел Индустри, Миле Ѓорѓиев истакна дека пред се учеството на синдикалните игри и освојувањето први места е потврда за општото расположение што владее меѓу вработени и нивната блиска соработка во работниот процес и надвор од него. „Посебно е важно што сето ова е поттикнато и поддржано од новиот менаџмент, кој ги мотивира вработените за повисоки цели во формалните и во рекреативните активности и се надевам дека под раководство на Еуроникел, задоволството на вработените ќе се зголемува а и учеството на вакви слични иницијативи“, додаде Ѓорѓиев.
Од раководството на Еуроникел потенцираат дека расположението и резултатите на нивните вработени на овие спортски игри се одраз на случувањата внатре во фабриката, којашто секој месец бележи нови и се поголеми производни успеси, како и успеси во другите деловни полиња од нивната дејност.
