Реализирани 133 проекти за рурална инфраструктура преку грантовите на ИПА

Завршени се целосно сите градежни работи финансирани преку ИПА грантот за рурална инфраструктура, во рамки на Проектот за подобрување на општински услуги – МСИП, што го спроведува Министерството за финансии. Станува збор за 133 капитални проекти реализирани во 78 општини во земјава, кои имаат за цел подобрување на квалитетот на живот во руралните средини и решавање на инфраструктурните проблеми.

Вкупната вредност, како што соопштуваат од Министерството за финансии, на овие проекти изнесува 16,9 милиони евра, од кои 12,7 милиони евра се грант – неповратни средства од Европската унија, додека 4,2 милиони евра се обезбедени од Буџетот.

Најголем број од реализираните проекти се во изградба и реконструкција на локални патишта, за кои во 58 општини инвестирани се 12,4 милиони евра. Во изградба на јавни објекти инвестирани се 5,9 милиони евра, во комунална инфраструктура 3,8 милиони евра…

Голем дел од овие проекти се веќе ставени во употреба, додека дел од нив наскоро официјално ќе се пуштат во успотреба. На пример, денес во општина Петровец официјално ќе се пуштат нов локален пат и две реконструирани улици во вредност од 260.000 евра.

Грант средствата за развој на рурална инфраструктура се обезбедени од Европската унија на барање на Владата, а истите се администрирани преку Проектот за подобрување на општински услуги, што го спроведува Министерството за финансии со поддршка на Светска банка.