Три сообраќајки дневно во просек во Тетово

Според најновите податоци од статистиката на Секторот за внатрешни работи за јули, на тетовското подрачје се случиле вкупно 99 сообраќајни несреќи, од кои 70 во населено место и 29 на отворено. Полициските службеници во тетовскиот регион за јули вкупно откриле и соодветно санкционирале 1.896 сообраќајни прекршоци.

– Во последната сообраќајна незгода, 43-годишна жена од кичевското село Стрелци вчера во Тетово била удрена од возило на улица „Радован Цониќ“, па поради добиената скршеница е задржана на лекување во тетовската клиничка болница. Инцидентот се случил околу 15 часот, а возилото „Мерцедес“ со тетовски регистарски ознаки, го управувал Ф.Д. (24) од Тетово, информира портпаролот на СВР Тетово Марјан Јосифовски.

Во текот на минатиот месец на поширокото тетовско подрачје вкупно биле регистрирани 17 повредени пешаци, од кои пет завршиле со тешки, а 12 со лесни телесни повреди. Двајца пешаци до денес се повредени во текот на август. Најголемиот број од ваквите несреќи се случиле на тетовските улици.