Календарот во Формула 1 во 2020 година ќе содржи 22 трки

Формула 1 ќе има 22 трки следната сезона, потврди календарот, кој официјално беше објавен од шефовите од „Либерти Медија“.

Кампањата ќе започне со традиционалното австралиско Гран-при на 15 март, а ќе заврши во Абу Даби на 29 ноември.

– Бидејќи станавме дел од спортот во 2017 година, зборувавме за развој на нови дестинации за проширување на нашата визија за Формула 1 и, во исто време, консолидирање на нашето присуство во Европа – традиционалниот дом на спортот. Ова е значајно за нашиот спорт и ја потврдува нашата долгорочна стратегија, рече извршниот директор на Формула 1, Чејс Кери.

Зголемување на календарот на 22 натпревари се очекуваше од многумина бидејќи беше разјаснета иднината на Големата награда во Шпанија, Мексико и Велика Британија. Самите тимови во најпрестижните автомобилски трки веќе се согласија да го прошират календарот. Сезоната ќе вклучува седум случаи со натпреварувања во последователни викенди. Како што се очекуваше, германското Гран-при, дел од годинешниот календар од 21 трка, нема да биде дел од оваа година. Виетнам ќе биде домаќин на трка во Формула 1 на улиците на Ханој за прв пат на 5 април, додека холандското Гран-при ќе се врати на календарот по 35-годишно отсуство со трка во Зандворт на 3 мај.

Гран-при на Азербејџан, што се одржува кон крајот на април годинава, ќе биде префрлено на 7 јуни, додека шпанското Гран при, чие присуство на календарот беше потврдено во вторникот, ќе се случи на 10-ти мај.

Договорот за обезбедување на иднината на италијанското Гран-при во моментов се финализира, се вели во соопштението. Трката во Монца е дом на најпопуларната екипа во Формула 1 – Ферари, а локалните организатори и власти сакаат таа да остане на календарот.

Нацрт-календарот ќе биде испратен до Меѓународната автомобилска федерација (ФИА) на 4 октомври, каде ќе го добие своето конечно одобрување.