Определен притвор за британски државјанин кој продавал дрога во хостел во Битола

Основното јавно обвинителство Битола донесе наредба за спроведување истражна постапка против едно лице, државјанин на Велика Британија по потекло од Битола, за кого постои основано сомнение дека сторил кривично дело неовластено производство и пуштање во промет наркотични дроги, психотропни супстанции и прекурсори.

Од Јавно обвинителство денеска соопштија дека осомничениот 33-годишник имал привремен престој во еден хостел во Битола и на 30-ти јануари неовластено набавил марихуана во вкупна нето маса од 24,68 грама.

– Дел од дрогата за износ од 500 денари тој му ја продал на едно лице, додека остатокот бил пронајден при претресот во неговата хотелска соба, се појаснува во соопштението.

Надлежниот јавен обвинител до судијата на претходна постапка од Основниот суд во Битола доставил предлог за определување притвор за осомничениот. Судијата го прифати предлогот и со решение определи притвор во траење до 30 дена.