Дваесет и двегодишен Гевгеличанец обвинет за силување малолетничка

Основното јавно обвинителство Гевгелија до судијата на претходна постапка при гевгелискиот Основен суд достави предлог за определување мерка притвор за едно лице, осомничено дека сторило кривично дело „силување“ од член 186 став 2 во врска со став 1 од Кривичниот законик.

– Притворот беше побаран бидејќи постојат околности кои укажуваат на опасност од бегство на осомничениот, како и можност тој да се обиде да ги сокрие трагите од кривичното дело, да ја попречува кривичната постапка со влијание врз сведоците или да го повтори делото. Постапувајќи по предлогот на јавниот обвинител, судијата на претходна постапка донесе решение со кое на лицето му определи притвор во траење од 30 дена, соопшти Јавното обвинителство.

Во соопштението се посочува дека станува збор за 22-годишниот жител на Гевгелија за кој гевгелиското Основното јавно обвинителство донело наредба за спроведување истражна постапка поради основано сомнение дека тој на 23 февруари присилил на обљуба девојче на возраст од 14 години.

– Оштетената дошла во домот на осомничениот заедно со нејзин другар. Во домот на осомничениот имало уште едно лице, кое ја турнало оштетената во собата со осомничениот и ја заклучило. Со употреба на сила и закани, осомничениот извршил обљуба врз малолетничката, која цело време викала и барала помош, а потоа и се заканил на никого да не кажува за настанот, се наведува во соопштението.