Ваучерите за туризам на располагање, граѓаните внимателни поради КОВИД-19
Хотели, приватни апартмани, автокампови, одморалишта и бањи, се дел од капацитетите низ земјава во кои може да летуваат или зимуваат граѓаните со приходи до максимум 15.000 денари месечно.
Ова го овозможуваат ваучерите од 6.000 денари кои им се веќе испорачани и кои може да ги искористат до 15 декември годинава, а се дел од мерката „Дома си е дома” за поддршка на домашниот туризам.
Вкупно 117.122 граѓани може да ги користат ваучерите за одмор. На Платформата www.domasiedoma.gov.mk и www.pushimenevend.gov.mk може да одберат некој од сместувачките капацитети.
Првичната оценка на сместувачките капацитети е дека луѓето се заинтересирани за искористување на поддршката, но засега се уште се плашат од ситуацијата со КОВИД-19. Агенцијата за туризам, пак, очекува годинава од домашните гости да бидат остварени повеќе од два милионa ноќевања, бројка во која значителен удел ќе имаат токму ваучерите.
-Ние претседававме со Координативното тело во кое коморите заеднички ја донесоа мерката за домашниот туризам. Очекувам заеднички до крајот на годината да оствариме повеќе од два милиона ноќевања, во кои секако и ваучерите ќе имаат сериозен удел. Тоа ќе помогне за намалување на негативниот тренд во туризмот и, ако дозволат условите, да имаме помал минус од останатиот дел на регионот, вели за МИА директорот на Агенцијата за поддршка и промоција на туризмот, Љупчо Јаневски.
Откако ќе бидат искористени ваучерите од страна на граѓаните, Министерството за економија ќе им ги исплати средствата на туристичките капацитети за дадените услуги врз основа на доставена месечна фактура и месечен извештај за реализираните ваучери.
Платформата „Дома си е дома” беше официјално промовирана пред еден месец од министерот за економија Крешник Бектеши и министерката за финансии Нина Ангеловска. Претходно беше соопштено дека сите туристички капацитети кои сакаат да бидат дел од оваа владина мерка и да се најдат на Платформата, мора да бидат категоризарани и регистрирани.
